Þriggja leikja langhundur

Grein skrifuð Mánudagur, 05 desember 2016
 

Vegna anna tíðindamanns heimasíðu FSu hefur því miður farist fyrir að greina frá úrslitum og fjalla um leiki undanfarið. Beðist er velvirðingar á því og reynt að bæta þar úr, þó seint sé.

 

Síðast var greint frá leiknum gegn Hamri í Hveragerði þann 17. nóvember. Til að gera langa sögu stutta hafa þrír tapleikir bæst við síðan, og taphrinan því orðin 6 leikir í röð, eftir að liðið vann 4 af fyrstu 5 leikjunum. Í þessari baráttu ungs og óreynds liðs hefur ekki bætt úr skák að tveir leikmenn hafa sest á sjúkrabekkinn, til viðbótar þeim lykilmönnum sem nokkuð tíðrætt hefur hér verið um að væru meiddir. Beggja þessara nýjustu meiðslamanna saknar liðið í baráttunni undir körfunum, Arnþór Tryggvason var varla kominn með leikheimild þegar hann sneri sig illa á æfingu og Hörður Jóhannsson sömuleiðis þegar einungis 3 mínútur voru liðnar af leiknum í Hveragerði.

 

ÍA-FSu 17.11.

Í þennan leik náðist að skrapa saman 9 leikmönnum, en hins vegar náðist ekki að skrapa saman neinni alvöru stemmningu og heimamenn á Akranesi voru við stjórnvölinn nánast allan tímann. Þó kviknaði á einhverjum perum undir lok leiksins og FSu náði að minnka muninn í 2 stig og vinna svo boltann þegar skammt var eftir. Mistök í innkasti við hliðarlínu kostuðu hins vegar tvö stig í andlitið og síðustu tilraunir okkar manna fjöruðu út en Skagamenn áttu síðsta orðið og unnu 74-67.

 

Derek Shouse var bestur Skagamanna en Jón Orri Kristjánsson skilaði sínu, þó hægt færi, 11 stigum, 11 fráköstum og 25 framlagspunktum. Björn Steinar Brynjólfsson (14 stig) og Sigurður Rúnar (12 stig) voru einnig betri en enginn.

 

Að venju var Terrance langatkvæðamestur í FSu-liðinu með 42 stig og 9 fráköst, 35 framlagspunkta. Ari Gylfason skoraði 13 stig og bætti upp slaka þriggjastiganýtingu með 8 fráköstum og 4 stoðsendingum, Svavar Ingi skoraði 7 stig en gerði þó enn betur með sínum 12 fráköstum. Hilmir Ægir skoraði 3 og Gísli 2 stig.

 

FSu-Höttur 26.11.

Næst var komið að heimaleik gegn toppliði Hattar. Ekki komust þeir Héraðsbúar suður á réttum tíma og því var leiknum frestað um sólarhring og leikinn kl. 7 á laugardagskvöldi, þrátt fyrir hófleg mótmæli okkar, þar sem þessi leiktími varð til þess að við misstum enn einn leikmanninn úr hópnum. Ekki var hlustað á það.

 

Ekki varð þetta skemmtilegur leikur, mikið flautað og á stundum furðulega, tæknivillum og óíþóttamannslegum villum útdeilt af töluverðum móð án sjáanlegarar, bráðrar nauðsynjar. Hvað um það var Höttur bara sterkara liðið og vann með rúmum 20 stigum, 81-102.

 

Það var helst til tíðinda að þegar nokkrar mínútur voru eftir, og gestirnir með nærri 30 stiga forystu, skiptu báðir þjálfararnir sínum byrjunarliðsmönnum útaf. Þá brá hins vegar til þess að FSu strákar minnkuðu muninn töluvert og þjálfari Hattar svipti öllu sínu byrjunarliði inn á aftur, væntanlega til þess að forðast þá niðurlægingu að vinna með minna en 20 stigum.

 

Aron Moss var magnaður hjá Hetti með þrefalda tvennu, 21 stig, 13 fráköst og 14 stoðsendingar. Hreinn Gunnar skoraði 14, Mirko Stefan Virijevic 14 (9 fráköst) en aðrir minna.

 

Terrance Motley skoraði 33 stig fyrir FSu og tók 9 fráköst, Svavar setti 10 stig, Ari 9, Sveinn Hafsteinn 7, Sigurður Jónsson og Haukur Hreinsson 6 hvor, Helgi Jóns. 5, Hilmir Ægir 3 og Jón Jökull Þráinsson 2 stig.

 

Vestri-FSu 2.12.

Þriðji og síðasti leikurinn í þessari hrinu fór fram á Ísafirði sl. föstudagskvöld. Nokkuð vantaði af malti í okkar menn lengst af leik. Terrance átti sinn slakasta leik hingað til, hitti illa, tapaði boltum og var ekki beittur varnarlega. Þetta einbeitingarleysi lýsti sér m.a. í því að hann nældi ér í 5 villur þegar töluvert var eftir af leiknum og Vestri með örugga forystu. En þá vöknuðu aðrir sem betur fer til lífsins og hleyptu spennu í viðureignina. Með mikilli liðsbaráttu og góðum varnarleik náðu þeir að minnka muninn í aðeins 3 stig. En dómaraskandall kom í veg fyrir að þeir fengju þann möguleika sem þeir áttu að fá til að minnka muninn enn frekar eða jafna leikinn. Vestramenn lentu í vandræðum með pressuvörn gestanna og voru gott betur en 8 sekúndur fram yfir miðju, þannig að FSu hefði átt að fá boltann og þar með umrætt tækifæri til að gera enn frekari atlögu að sigri. En dómaraparið var því miður ekki með á nótunum og FSu varð að brjóta á besta manni Vestra, Hinriki Guðbjartssyni, sem setti niður 2 víti af öryggi og tryggði sigur heimamanna.

 

Hinrik var allt í öllu hjá Vestra, skoraði 34 stig, hitti 6/11 úr þristum og 10/10 úr vítum. Yima Chia-Kur skoraði 15 stig, Knezevic og okkar maður, Adam Smári Ólafsson (7 fráköst), 11 hvor og Magnús Breki 9 stig (10 fráköst).

 

Ari Gylfason var stigahæstur FSu-manna með 24 stig og 40% nýtingu, sem er umtalsverð bæting frá fyrri leikjum í haust (6/6 í vítum), og tók 8 fráköst. Hann byrjaði fyrsta fjórðung af krafti með 7 stigum og leiddi endurkomuna í lokin með mikilli baráttu og góðum körfum. Motley skoraði 23 og tók 14 fráköst en missti af síðustu 6 mínútum leiksins sem reyndist dýrkeypt. Svavar skoraði 10 stig, Gísli Gautason 8, Hilmir Ægir 7 og Haukur Hreinsson 7, auk þess að taka 6 fráköst og gefa 6 stoðsendingar.

 

 

FSu Karfa

Tryggvagötu 25
800 Selfoss
Kt 550606-0890

FSu karfa

Saturday the 16th. Template by Joomla Template 2.5. FSu Karfa - Selfoss
Copyright 2012

©